Illuut a/s ulloq 22. december 2009 Inatsisartut 2009-imut Aningaasanut inatsisaanni kontomut pingaarnermut 87.72.13-imut oqaasertaliussami piginnaatitsissut naapertorlugu pilersinneqarpoq.

Uani Illuut-ip pilersinneqarneranut uppernarsaat aamma maleruaqqusat pdf-inngorlugit takusinnaavatit.

Uani Aningaasaqarnermut Ataatsimiititaliap aalajangernera pdf-inngorlugu takusinnaavat.

Ingerlatseqatigiiffiup pilersinneqarneranut siunertaavoq realkredittimit taarsigassarsinikkut Naalakkersuisut aningaasalersuinermut teknikkikkut sakkussaqalersinnissaat. Illuut A/S-ip taamaalilluni illuutit pigisarissavai.

Ingerlatseqatigiiffiup siunertaraa pigisanik aalaakkaasunik pisisarnissaq, sanaartornissaq pigisaqarnissarlu, saniatigut pigisanik aalaakkaasunik tunisisarnissaq imaluunniit attartortitsisarnissaq, taamatullu ingerlatseqatigiiffik atuunnerminut atatillugu inissianik ingerlatseqatigiiffiup pigisaanik isaterisinnaavoq. Ingerlatseqatigiiffik taamaalilluni allap pigisaanik aalaakkaasumik suliaqarnissamik kiffartuussinissamillu ingerlatsisussaanngilaq.

Sutigulluunniit ingerlatseqatigiiffik aaqqissuussaanermini aktiaatileqatigiiffiit Namminersorlutik Oqartussanit tamakkiisumik pigineqartut allat assigalugit aaqqissuussaanngilaq. Ingerlatseqatigiiffiup siulersuisui qullersaqarfialu Namminrsorlutik Oqartussat allaffeqarfiannit atorfilittaneersuupput. Taakkua ingerlatseqatigiiffimmit aningaasarsiaqartinneqanngillat imaluunniit akissarsiaqartinneqaratik. Taamaalilluni aktiaatileqatigiiffik ileqquusartutut »nammineq ingerlasoq«, nammineq siunertaqartoq aamma sammisassanik aalajangersaasartoq namminerlu allaffeqarfeqartoq pineqanngilaq, kisiannili aktiaatileqatigiiffik taamaallaat aningaasalersuinermi teknikkikkut sakkussatuinnaq pilersitaavoq. Ingerlatseqatigiiffik namminerluunniit allaffeqarfinnik atugassaqartussaanngilaq.

Ingerlatseqatigiiffik A/S 2009-imi oqaasertaliussaq naapertorlugu blok 11-17 Nuummi Qapiarfiusaami inissisimasut akiliutigineqarnerat aqqutigalugu aningaasalersorneqassaaq.